茶茶GO (已結業)

行街行到好熱，咁啱經過就買咗兩杯嘢飲解下渴。自己嗌咗杯凍嘅烏龍烤奶茶配黃金珍珠。茶味幾濃下，而且啲珍珠個人都非常鍾意，咬落去幾煙韌，食落亦都唔會變到好粉。同埋啲珍珠甜甜地，由於揀咗少甜，配埋啲茶嘅味道啱啱好。整體來講，成杯嘢嘅甜度同茶味都配搭得幾好。而朋友就嗌咗杯店舖推薦嘅芋頭一號，其實即係芋頭鮮奶，一樣都係配咗黃金珍珠。芋頭份量都幾足料，試飲咗一啖，都相當唔錯，鍾意飲鮮奶係嘅朋友會相當鍾意。另外除咗飲品之外，呢間小店竟然仲有買蛋糕同埋甜品。其中嘅紫菜肉鬆小貝賣相非常吸引，所以就買咗一盒嚟試，點知超好食！肉鬆同埋紫菜多就唔使講，估唔到入面仲有啲蛋黃醬，配合埋本身蛋糕淡淡地嘅蛋味，真心驚艷。返屋企之後雪一雪再食仲好食。非常推薦大家買嚟試吓。總括嚟講，依間小店飲品相當唔錯，而甜品就更加出色，可以番兜，下次經過再試埋蛋糕試!!