茶記冰室 (已結業)

父女档谂住系提早做冬所以出街食好啲，俾茶记冰室嘅盏鬼菜单吸引咗入去~~ 环境宽敞，有别于一般嘅茶餐厅格局，装修有玩味。 叫咗细羊腩煲，同冰镇咕噜肉。先上嘅系是日例汤，菜干粟米凤爪瘦肉汤，清清甜甜㖞，味道佳，好满意呢个汤。冰镇咕噜肉，真心，好食到不得了！每旧都麦乐鸡咁大，仲要无骨❤ 外皮超脆口，酱汁甜酸适宜，又有提子、车厘茄同菠萝点缀，好开胃，冰镇完之后令到油炸嘅燥热感觉消失晒，不愧为招牌小菜！初时仲担心啲冰溶晒会浸到咕噜肉唔脆，所以急急脚夹走上面啲冰，食到一半先发现个容器中间有一层冰隔，隔开冰溶出嚟嘅水，方便客人慢慢食，呢个设计亦不得不赞！再黎羊腩煲，呢个都大赞！羊腩炆得好淋好入味，羊皮羊脂入口系啖啖油香而唔系膻味；汤汁好浓，用黎捞饭更生色不少，滚生菜，生菜吸收晒羊腩煲嘅精华，就咁食都好正！而且羊腩煲好足料，有好多羊腩、腩皮肉😍 又有冬菇、腐竹、马蹄、笋，仲跟一碟生菜，成煲分量好大， 一个细煲够晒两个人食。两味菜皆十分出色，爸爸都话好耐冇食过咁有水准嘅餐厅，一定要介绍朋友黎食添。