大都淮揚中菜 (已結業)

每年大闸蟹季节都要大拆一餐，今年拣咗呢间位于湾仔嘅大都淮扬，餐厅装潢高雅有格调，环境宽敞，枱与枱之间间距宽阔，能够保持社交距离之余亦为食客留有一点私隐度。今日拣咗大闸蟹飨餐$498（另加服务费、茶芥）。套餐包括2皇1后，一共有3只大闸蟹，侍应介绍蟹种选用鲜活 黄毛金爪，货源有保证，今日呢只蟹皇有成5両重，蟹后乸都有3両半，只只都爆晒膏，鲜黄色蟹膏味道浓厚香醇，细味齿颊留香，属高质靓蟹。以呢个价钱食到咁高质嘅大闸蟹性价比相当高。虽然今日嘅主角系大闸蟹，但各款淮扬美食一啲都冇被比下去。其中呢味灯影鱼片、冰宫肴肉，摆盘细致，鱼片丝薄透光，香脆美味，肴肉晶莹光滑，肥而不腻。豆腐羹非常香滑，蟹粉小笼包皮薄馅靓，咬开汤涌出，鲜味四溢。原只鲍鱼葱油拌面，鲍鱼非常入味，肉质充满弹性。雪里红手剥虾，虾肉爽口弹牙，鲜度十足。薏米汤圆，薏米够腍，汤圆柔软香甜。仲有任饮陈年雕皇！呢餐够晒丰富。今日埋单用左云闪付银联二维码俾，消费净额够$500就送50蚊现金券，下次再嚟就可以了用啦。