牛涮鍋 (已結業)

今日自己一个去咗食牛涮锅，其实入边都几多人一个人食，个汤底我叫咗香草蚬汤同埋麻辣汤，个蚬汤冇乜蚬味，不过都带有点蔬菜嘅甜味，所以全程都系食麻辣汤比较多，个麻辣汤就唔错，冇乜油但系就几多花椒，所以食落口都几香，点少少豉油就够，咁先唔会遮左佢阵香味。肉类方面我净系食咗猪肉同牛肉，猪肉反而冇上次咁滑，煮熟左有啲鞋，牛肉就反而几好，几香牛肉味。配料方面多咗几只新既丸类，有一只系入边包住粟米浓汤，有一只系黑松露忌廉汤，有一只系芝士丸，食得出有啲芝士味不过就真系偏甜，沟得其他嘢太多。公仔面我就建议佢分一半，成个面实在系太多啦，而且都好难放入去个锅。甜品方面就真系一个大伏，当啲甜品系赠品就好啦，唔好认真。佢𠮶个青苹果雪糕一支出嚟已经溶溶地，食落口超级大化学味，吐都吐唔切，原味雪糕就普通cheap野云呢拿味，薄荷蛋糕加埋佢只质地就好似牙膏，芝士蛋糕冇芝士味，唯一好少少就Oreo芝士蛋糕，但系我始终觉得芝士系带酸味，捞埋啲Oreo就唔系好夹，唔好捞得咁碎应该会好食啲。拎啲甜品浪下个口就够，主力食返牛肉啦。