Cocina 3 Tapas Restaurant & Bar (已結業)

之前嚟呢度食过一次，觉得佢哋性价比高，所以今日再嚟回味一番。个餐牌好似有少少变动，睇落多咗好多唔同嘅食品选择，俾我发现一个马德里传统牛肚，估唔到西班牙都有我哋香港人钟意食嘅牛肚，烹调方式用大量香料腌制，一上枱已经闻到一阵阵香料酥香味，牛肚炆得好淋，味道浓厚但唔会好咸，其实呢个𩠌白饭真系唔错，食我哋冇嗌白饭。龙虾海鲜忌廉汤，估唔到佢哋嘅份量10分大，我哋两个人share，每人都有一整碗嘅汤，汤料十分多，鱿鱼及虾等，龙虾味浓及鲜甜，加咗忌廉令到个汤更加顺滑。炸和牛舌配蕃茄莎莎，牛脷一向系我最钟意嘅小食之一，和牛脷更淋及牛味更浓，加上蕃茄铺面减少肥腻感。蘑菇火腿手打自家薄饼，基本上系一个浓厚芝士批，水准唔错。加埋一杯啤酒，一路食一路吹水，写意。