篤篤車 (已結業)

车仔面平时食得多，但系冬荫功汤同咖哩汤既车仔面都系第一次食，另外仲有鳄鱼汤，感觉几特别。食物款式都几多，除咗有车仔面之外，仲有饭，多款小食同埋饮品等等，而且价钱亲民。冬阴功汤三𩠌面萝卜清甜冇渣，炆得够透，豆卜豆味香，索哂汤汁精华，牛筋炆得够腍，不失弹性，而且都入味。油面顺滑，食落唔会油腻，口感烟韧。咖喱汤两𩠌面咖喱汤底有大中小辣，我哋拣咗小辣，味道浓郁，而且辣得惹味，饮落顺喉。红肠厚薄适中，有咬口，味道咸香。贡丸口感爽弹，食到香菇粒同菇既香味。面就拣咗米线，米线煮得啱啱好，软硬适中，索埋咖喱汤底，够晒入味。泰式炸鸡翼鸡翼一共有四只，每只都大大只，外皮炸得够脆，鸡肉都几滑，而且有肉汁。点埋泰式辣酱，酸甜解腻。腐乳炒唐生菜都有镬气，咸度适中网纹春卷春卷皮口感酥脆，食落好香口，馅料丰富饱满，唔错。吉列炸虾饼虾饼炸到金黄色，非常吸引，虾饼爽口弹牙，而且几鲜味。香甜蔗虾蔗虾虾肉爽弹，几香口。薄荷青柠梳打薄荷同青柠互相融合，酸酸甜甜，口感较为清凉，几解渴。红茶花伝柠檬茶柠檬茶酸甜开胃，甜度适中，而且有茶香。