阿里山 (逸酒店) (已結業)

  时不时行街都见到古早蛋糕店，撞到出炉，d香味真系香到流晒口水，今日去红磡揾朋友，佢同我推介呢间 #阿里山 古早味蛋糕 ，佢话d蛋味特别浓，咁我即管试下，我同朋友夹份买咗粒粒朱古力、日本柚子蜂蜜、原味同四重芝士。等紧师傅切蛋糕个时顺便倾下计，原来佢哋对原材料好讲究，用嘅系日本面粉；韩国砂糖，蛋就用湖北鸡蛋，佢哋之前试过好多产地嘅鸡蛋，最后觉得湖北蛋做出黎嘅蛋糕蛋味最香浓，而且佢哋每次都会先洗干净鸡蛋至打蛋，比一般蛋糕店更卫生更用心。四重芝士蛋糕面有香浓芝士碎，咸香非常惹味，蛋糕内重有芝士夹心馅，配埋软绵蛋糕，好正👍至于粒粒朱古力蛋糕，净系见到面头d朱古力粒，已经知够晒足料，蛋糕入面重有朱古力酱，甜味适中，做下午茶点心真系好幸福，唔怪得当日买蛋糕个时见到好多家长学生都嚟买。由于蛋糕无防腐剂，所以室温的话只可以摆一晚，之后就要放入雪柜 咁就可以摆多两日，如果惊食唔晒，可以个别要求师傅卖半份蛋糕都ok.