豐盛牛肉麵

营业中

休息中

放假喺屋企煲剧耍废左全日，发现肚饿嘅时候已经到咗夜晚～于是又惯常咁打开OpenRice睇吓土记有咩好西食，发现呢间丰盛牛肉面未食过，于是就喳喳临换衫落去试下佢～呢间小店除咗有牛肉汤面之外仲有其他唔同嘅台式料理，包括卤肉饭、干拌面，仲有好多唔同嘅台式风味小食，选择花多眼乱！最后我都系拣咗个红烧牛腩牛筋面，加多杯珍珠奶茶试吓先，好食嘅先下次再嚟试其他～呢碗牛腩牛筋面好大碗嘅，上面有两三旧好大旧嘅牛腩+加两三旧牛筋～ 首先试一试一个汤底先！第一啖饮落去觉得佢偏淡，心谂汤底嘅颜色咁浓烈，但系点解咁淡呢？之后再饮多啖就发觉个汤底系有啲菜甜味再加少少牛肉味，好好饮！饮完个咀仲会有啲浆住嘅感觉，但系绝对唔会觉得口渴，我敢写包单一定冇落味精！你见我差唔多饮晒成碗就知！我睇返个Menu先知原来佢哋嘅汤头系以新鲜牛大骨加入炒过嘅牛肉再加大量蔬菜慢火细熬而成，唔怪得个汤咁甜咁浆口！至于个牛腩，就相对冇个汤咁出色，食落系松化嘅，不过有啲瘦，所以食完会劲摄牙罅！至于个牛筋都炆得好林好入味嘅！至于个面就正正常常啦，不过就唔系好挂汤！整体来讲成碗牛肉面嘅份量真系好大碗，质素亦都唔错嘅，个汤底就真系个人觉得做得好出色