樂天皇朝 (雅蘭中心)

营业中

休息中

其实间中都想食吓乐天皇朝嘅小笼包，今日就约咗朋友嚟呢度，顺便同佢庆祝生日。门外已经有非常清晰嘅餐牌，就算要等位都可以睇定食乜。以今时今日嘅餐厅嚟讲，呢间嘅规模都算几大间，环境宽敞坐得舒服，约朋友嚟就啱晒。前菜花生栗子虽然并非名贵菜式，但佢嘅花生同栗子炆得好好食。嚟得呢度，一定要叫佢嘅特色皇朝小笼包，因为可以试晒八款唔同嘅口味。点菜后店员就会递上说明书，建议由原味(白色)开始，再顺序品尝人参(绿色)、鹅肝(啡色)、黑松露(黑色)、芝士(黄色)、蟹粉(橙色)、蒜香(灰色)，最后系麻辣(红色)。其实每一款嘅味道都好突出，而我尤其喜欢佢嘅蒜香同麻辣味，当然传统嘅味道亦相当出色。另外我哋拣咗李白醉鸡，去咗骨嘅醉鸡啖啖肉，亦都充满酒香，肉质鲜嫩令人回味。油麦菜除咗配豆豉鲮鱼，原来配麻酱都一样咁好食。麻酱油麦菜用一片好薄好薄嘅青瓜卷住新鲜嘅油麦菜，方便蘸麻酱进食，清新之中带点芝麻香。最后叫咗份主食，鲜虾抄手拌面总共有四大只鲜虾抄手，鲜虾非常爽口，而佢嘅酱汁带有酸、麻、辣嘅味道，真系非常醒胃。原来下午茶时段仲有六折优惠，下次攞半日假嚟可以叹吓佢嘅下午茶。