喜悅皇宮 (已結業)

上星期第一次踏足呢个比较偏僻嘅商场时一抬高头见到有间酒楼，外墙嘅皇宫设计好触目，忍唔住望多两眼，走𠮶阵留意到入面贴嘅广告，见价钱都都几街坊，所以今次同朋友嚟饮下午茶。一到去见酒楼都几大，人唔算多，好多位，职员叫我哋随便拣位，好快冲好茶，我哋两个人叫咗六个点心，一碟炒河，埋单$200有找。点心味道可以，下午茶又唔使同人逼，职员有笑容有礼貌，价钱合理，感觉唔错。蜜汁叉烧肠，每件都胀卜卜，几足料，皮都几滑。鲜竹牛肉球，唔系好有牛肉味，但又唔会腌到好松无晒肉嘅口感，口感唔错。蜂蜜蛋散，每次见到都必点，唔系好多酒楼有，可以再松化啲。萝卜丝酥，食嘅时候系暖，可能系炸定烘住保温，外面稍为有少少干，无入口即溶嘅酥，馅嘅味唔错，整体都可以。奶黄流沙包，流沙做得好好，唔会太稀，馅甜咗少少，奶皇味重。喜悦虾饺皇，呢个麻麻，皮同馅好易分开，虾肉亦唔爽口。干炒牛肉河，少油，味唔重。