旺記冰室 (大本型) (已結業)

之前有听过旺记冰室嘅滑蛋饭好吸引、好多人食，咁岩大本型新开张，咁我就同朋友两个人入咗去试下啦！虽然要等位，但唔使排好耐。店员速度非常之快，一坐低就有餐牌递上黎。佢系开放式餐厅，不过个环境都算几靓，装潢不错！「瑕不掩瑜」本身谂住叫叉烧滑蛋饭，但见到牛肉同埋虾呢个配搭都几吸引，最后就叫咗呢个喇。 牛肉好软身，虾仁爽口， 滑蛋有啲部分系未完全熟晒，捞埋佢个豉油汁其实几夹。同埋有酱汁嘅湿润，捞埋底果啲饭，成件事系好开胃！ 豉油汁唔系偏咸嘅，反而系有少少甜，有啲似煲仔饭豉油，但又冇咁浓，可能系厨师自己调过，几唔错。 但美中不足系份滑蛋唔够厚，如果有多少少蛋攞嚟配饭，就非常之理想喇！ 热奶茶好浓厚，茶味非常够，吞落去之后仲有回甘嘅茶味，好欣赏！最后要再重点赞嘅系，成间店舖嘅店员速度都好快！无论系煮嘢食嘅定系传菜嘅都超级快！如果想拿拿林食完一餐嘅一定要去试！