七月餐室 (已結業)

九龙湾工商区呢边其实几多茶餐厅，但好多都系工厦入面感觉几颓…近日发现开左间新野叫七月，门口企理入面光猛，感觉唔错㖞。价位同附近餐厅差唔多，午餐选择都几多，炒粉面饭、港式、中式、西式、台式、日式等大包围，总有一款啱口味，哈哈。叫左个扬州炒饭，大碟又足料，金黄色好吸引，炒到啲饭粒粒分明，仲唔油腻添，好香好好食！另外仲叫左个漏奶华，个名好搞笑，哈哈，见隔离枱食好正咁，即叫唔使谂。以为系西多士加阿华田粉？无咁简单呀，一切开啲奶就涌出嚟，真系漏奶啦～多士软绵外层炸得香脆，洒上大量阿华田粉，块多士仲夹咗牛油同埋花生酱，捞埋啲奶一齐食真系又香又甜，邪恶到爆分。餐饮要咗杯冻柠茶走甜，茶底几香柠檬冇苦，合格啦。个西多制作需时，碟饭食到一半个西多就嚟咗喇，见佢热辣辣唔好嘥，梗系食咗个西多先啦，食完都饱咗，碟饭食唔晒唯有打包啦～满足满足！