小越廚

营业中

休息中

是日喺荃湾做完嘢，本来谂住食餐求其饭，点知食到呢间越南菜餐厅，作风低调但味道出色，值得推介！一个人去食可以随便叫碗粉面就搞掂；如果两个人去食，可以叫二人套餐。$228 包两碗粉面/咖喱、泰式青木瓜沙律、3款自选小食及两杯饮品，另可加价柯打升级小食/甜品添，一个set搞掂晒！咖喱猪扒法包咖喱入面有炸得带点微脆的猪扒、薯仔等配料，分量亦都几大份。猪扒加咖喱汁，连埋烘脆法包，好惹味！火车头汤河粉以生牛肉、牛丸、牛筋而成的越式牛肉汤河。一上枱，见到食物卖相好足料，又有洋葱、芫茜、黑椒等浓味配料，以为整碗味道好浓郁，甚至过咸；点知味道都keep住系清香，不会太over；生牛肉、牛丸、牛筋呢3款配料之中，最抵赞的系牛筋，入味之余仲煲得好软腍，好正！泰式烧猪颈肉小食分量比想像中多，好抵；猪颈肉本身已经充满油香，沾埋跟碟上的酸辣酱，味道更香浓，猪颈肉边边仲有啲焦脆添，好难得！泰式海南鸡正常水准，无嘢好弹！泰式青木瓜沙律青木瓜拌以越式鱼露、胡椒粉、辣椒粉、洋葱、番茄、菠萝等配料而成，味道清爽微辣，几开胃。青柠七喜饮品都够大杯，都算有诚意嘅！餐厅光线充足，灯泡更以越南帽衬托，颇有特色。