野川拉麵 (已結業)

元朗「臭渠」呢边有甜品店、串烧火锅店、拉面店，细味发掘，会揾到好野食。第一次食野川拉面，面舖细细唔易发觉，舖内似居酒屋格局，有木枱木櫈，墙上放咗几幅啤酒广告、手写餐牌，好有日系feel。男友叫咗汁烧极上和牛稻庭乌冬，一碗5块薄和牛片，好有牛味，易咬无渣唔靭。乌冬较幼身，烟烟靭靭，好有米感味道。配上猪骨汤，浓郁得嚟唔会一层油喺面，仲有啲芝麻香。我几钟意食糖心蛋，一般食拉面都系配半只，唔系好够喉，呢度一俾就俾一只，无额外收费。切开一半个蛋黄系半凝固状态，好有香醇嘅蛋味。而我就叫咗猪软骨拉面，配芝士汤底。呢度嘅汤底有多两款选择，有埋芝士辣汤底拣，算配合潮流。芝士唔止溶喺汤度，有香浓嘅味道，而且拉面上都舖咗芝士仲喺半溶嘅状态。夹住面条食，好似食紧芝士面咁，好有韩风味道。猪软骨好腍，连软骨位都溶化到好似jelly 咁，好多骨胶原嘅感觉！串烧系呢度嘅另一个卖点，呢度有各类啤酒饮，配几串串烧食，呢件事好「佬」嘅行业，好坦荡荡。呢串烧安格斯牛肉串每粒都有丰富油香，牛味唔太浓，但质感系肥瘦均等，又无根。除咗串烧，仲有炸物可以叫。呢碟炸鱿鱼须无乜炸粉，喺上面洒咗七味粉，够咸香。而且条条都系幼须方便食。