牛奶冰室 (何文田廣場)

营业中

休息中

美食沙漠终于开多间新食嘢，食晏时间当然又会系大排长龙喇。二人座位相对上会快啲有得入座，唔想等嘅就提前打外卖专线嗌定先。瑞士鸡翼捞公仔面 $52配有牛乳炒滑蛋同蒜香牛油多士。多士边焗到有啲黑，蒜味好浓同埋有一层厚厚嘅牛油，而滑蛋就比较熟。公仔面味道好甜，感觉瑞士汁都落咗大量糖。鸡翼有三只，食到里面嘅肉系冇乜味嘅。麻酸辣牛肉炸响铃米线 $47汤底味道都好浓郁，麻辣味比酸味出，系愈食愈麻。响铃好吸汤，牛肉份量正常。米线煮到有啲涨，口感都好腍，份量多到都食唔晒。蜜汁叉烧煎双蛋饭 $58呢度嘅叉烧系厚切版，肉质有啲韧，比较难咬开。双蛋煎到刚刚好，一拮开就会有蛋黄汁流出嚟，捞埋饭食即时冇咁干。厚切猪扒劲香葱油饭 $56猪扒真系好大一块，完全遮盖咗个饭。猪扒系意想不到咁好食，啲肉好腍，仲带有少少嘅甜味。葱嘅份量系好多，饭带有葱油香味，但就略嫌有啲太油。