影片
更多
2014-07-23
21118 浏览
旧年公司周年饭改咗新制，同事无需跟老细一齐，可自行出去食番餐，所以去咗湾仔嘅万丽咖啡室（Cafe Renaissance），写咗篇题为「老细出钱我哋出力．四傻丧食」嘅食评（http://www.openrice.com/restaurant/commentdetail.htm?commentid=2313751），今年再接再厉，周年饭再度出击，继续丧食 ，依次睇住老细俾嘅预算，拣咗尖沙咀嘅马哥孛罗咖啡厅 （Cafe Marco），贪佢平日可以食到10:00pm ！其实餐厅唔细，据「开饭喇」嘅资料座位数目有成250，可能争取多啲空间，连个蚝吧及寿司、鱼生档都摆埋晌门口度，而整个食物区，几组食物枱，两个开放式厨房，都集中晒晌近入门口嘅位置。以一间5星酒店而言，餐厅内嘅枱櫈排得有点密，装修亦没有多大特色。4人嘅餐枱，显然仲有啲啲细，尤其食自助餐，摆多一、两样一齐分享嘅食物晌枱面，已经逼爆咁滞。 沙律．冷盘小食 沙律选择唔喺好鼎盛，调制好嘅沙律只有4款，如法式吞拿鱼沙律、希腊沙律……等等，再加7种沙律菜配8款左右配料、4款酱汁。不过，都够砌一份丰富嘅沙律，况且，沙律菜够新鲜，入口索索
其实餐厅唔细，据「开饭喇」嘅资料座位数目有成250，可能争取多啲空间，连个蚝吧及寿司、鱼生档都摆埋晌门口度，而整个食物区，几组食物枱，两个开放式厨房，都集中晒晌近入门口嘅位置。
以一间5星酒店而言，餐厅内嘅枱櫈排得有点密，装修亦没有多大特色。4人嘅餐枱，显然仲有啲啲细，尤其食自助餐，摆多一、两样一齐分享嘅食物晌枱面，已经逼爆咁滞。
沙律．冷盘小食 沙律选择唔喺好鼎盛，调制好嘅沙律只有4款，如法式吞拿鱼沙律、希腊沙律……等等，再加7种沙律菜配8款左右配料、4款酱汁。不过，都够砌一份丰富嘅沙律，况且，沙律菜够新鲜，入口索索声，再加少少烟肉碎、巴马臣芝士粉，捞啲意大利油醋，都可以清新味美。
沙律表演平稳，但啲冷盘小食则甚有惊喜，就晌沙律区侧旁，除传统嘅薄切冻肠、烟三文、烟鲛鱼外，有外国人可能几喜欢嘅五香牛肉、卤水豆腐，但最吸引小弟喺几样富特色嘅小食：越南纸米卷、巴马火腿露笋卷、牛油果黄梅杯、虾沙律。几款冷盘小食各具个性，而且，卖相的骰精致，最心水喺牛油果黄梅杯，将牛油果粒、黄梅干混入酸忌廉中，开胃有益又有咬口 。
餐汤．面包篮．芝士 中汤代表喺猴头菇蜜枣排骨汤，而西汤代表喺茴香薯蓉忌廉汤，今回见中汤都好家常，屋企都有煲过依类汤，所以，就主力试西汤。薯蓉食得多，薯蓉忌廉汤应该喺第一次试，估唔到个汤好重薯味，茴香味亦见突出，打得质感又几幼滑，好味 ！
面包篮款式以欧陆包为主，大大细细近10款，伴汤时先拎两个细嘅食，质感韧净，未必人人啱口味，但几有麦味，所以，再拎多个大嘅跟同事一齐试。
面包涂牛油又得（牛油有平价嘅花唛，亦有贵价嘅总统），伴芝士都得。因为芝士质素唔欺场，4款芝士：荷兰哥达芝士（Gouda）、瑞士爱蒙塔尔芝士（Emmentaler）、法国布利芝士（Brie）、英国车打芝士（Chedder），各有唔同特性，最好就款款切少少试晒佢，不妨以一块高纤麦饼嚟伴芝士，芝士味更能彰显 。
海鲜精选 海鲜冻盘始终喺一间卖自助餐餐厅嘅聚焦点，有啲人评价一餐自助餐正唔正，好多时都以海鲜嚟衡量，虽然多少较为片面，但始终都可睇成一个指标。依度海鲜包括：长蟹脚、翡翠螺、加菲蟹、甜虾、蚬、青口、波士顿龙虾，再加埋近门口嘅生蚝专柜，相信咁嘅阵容，都唔会有太多挑剔。虽然，有唔少人排拎海鲜，但货源供应足，都无咩缺货，而生蚝新鲜即开，每次限攞两只，嚟嘅斯文人居多，所以，排队井然有序。捧番碟海鲜精选拼盘埋位慢慢叹，样样都好好食，尤其长蟹脚、甜虾、龙虾、生蚝，食完一口海水鲜味 。
即煮活美国波士顿龙虾 波士顿龙虾除有烚熟冻食嘅龙虾冻盘外，仲晌开放式厨房增设「即煮活美国波士顿龙虾」，亦喺全场最多人排嘅档位，可算喺亮点之最。大型玻璃格内存放十数只波士顿龙虾，只只冰镇住仲郁郁吓，即㓥即煮，烹调需时，想食就要排吓队 。每次限攞半只，可拌蕃茄荷兰汁、香辣茄汁或 荷兰汁，实在芳香鲜甜，尤其蟹钳位，大大啖鲜龙虾肉，爽呀，所以，跟住一阵食热盘时再追加半只 。
热盘．澳洲和牛 热盘相对好多星级酒店嘅自助餐少，印象中大概十数款左右：咖喱、蒸鱼、时菜、牛仔骨、牛肉卷、炒薯仔、焗带子、炒饭、炒面，因为影热盘时，想逐样影相存记录而被疑似经理阻止，佢咁怕人知佢哋有咩热盘，咁我都无谓晌度多讲。一份综合热盘，样样执啲，但重点喺个即煎澳洲和牛（配菜有扒意大利青瓜、车厘茄、香草烤薯），以及翻兜嘅即煮波士顿龙虾。啲和牛又喺即点即煎，外层焦脆，但内里仍然粉嫩腍滑 ，就算唔喺试晒所有热盘，单以眼前依份「主菜」，食得叫人超满足啦 。
鱼生．寿司吧一起手无打算食鱼生、寿司，因为鱼生一般都喺𠮶两、三款大路嘢，寿司更旧旧饭，太易饱肚。不过，同事话啲珍宝带子刺身好掂，所以，最后我都无执输要番一客，另加几片吞拿鱼。的而且确，啲珍宝带子又大又厚肉，最紧要喺非常鲜甜，正 。顺带一提，和食仲有少少乌冬、冷面、特色寿司卷。
烧腊．面档有啲人总要食碗粉面饭先得安落，餐厅都有提供烧腊档同粉面档，由于兴趣不大，只喺影张相留记录，有咩食就留番有兴趣嘅人士自行走去睇睇。
甜品 杀咗咁多碟嘢，都接近尾声，又喺甜品时间。咪以为啲甜品一张大圆形食物枱睇晒（亦有生果盘），入啲仲有一座Movenpick雪糕柜，足有10款口味，而雪糕柜前又放咗唔少五颜六色嘅马卡龙。因为被人话过唔可以逐样嘢影，所以，今次甜品嘅款式都唔可以描述得太详细。
兜咗个圈，觉得啲甜品又唔算太吸引，最终拣咗7款：蓝莓芝士饼、咖啡味马卡龙、芒果蛋白瑞士卷、罂粟籽柠檬蛋糕、柠檬玛玲挞、杂莓意式奶冻、柠檬啫喱，因为几款都喺心水想试，感觉味道不俗，最欣赏个芒果蛋白瑞士卷及柠檬玛玲挞，前者松甩软回弹力十足，卷心件芒果又清甜；后者柠檬味清新，啲焗蛋白脆卜卜 。
Movenpick雪糕要青柠雪葩、热情果芒果雪葩及枫叶糖浆味雪糕，洒少少杏仁片，又加啲啲芒果浆。雪葩冰爽清凉，尤其青柠，酸度强劲，而热情果芒果亦唔错，热情果嘅酸味较芒果味突出，至于合桃枫叶糖浆味，口感细密，糖味浓郁得嚟清甜自然 。
依度唔兴果汁汽水任饮，只包餐茶1杯。小弟要咗一杯鲜奶咖啡，斋睇表面嘅奶泡及𠮶几滴咖啡痕，就知只喺机冲嘅货色，讲唔上好，亦唔算差，咖啡个味道无咩太大问题，只可以话个质感唔够丰厚，奶泡跟咖啡唔够「匀巡」。
星期五晚嘅自助晚餐成人收$558，另加一，不过指定信用卡又有番85折，最后折实为$530一位，其实一啲都唔平。若硬要跟旧年嘅万丽咖啡室比，我就钟意万丽多啲 。
张贴
