スーパー丼 (駱克道) (已結業)

那些年，喺各路「大碌喼神」降落前嘅黄金时代， 铜锣湾近SOGO一带曾经有小日本之称。纵然而家铜锣湾已经系另一回事，今日竟然撞入一间令人几惊喜嘅日本餐厅 - スーパー丼 Super don。见佢专食丼，感觉又干干净净，去吧！平时喺香港少食海鲜丼，因为去过太多𠮶啲乜乜水产，打正旗号卖鱼生饭，但食到嘅都系啲唔多新鲜，又或者系贵到爆但啲鱼碎上到揾笨嘅饭。今日坐低见到隔离枱𠮶碗海鲜丼个样都几精神，仲要加$20转套餐，就有埋面豉汤同埋蟹肉沙律，梗系试吓啦。先嚟嘅北海道海鲜丼无令人失望，里面有大拖罗、油甘鱼、帆立贝、蟹棒、海胆同埋三文鱼籽，丰富嘅画面先「色」夺人。食落更加发现所有刺身鲜甜美味，厚厚的，好足料，最重要系连wasabi 都好好味㖞。呢个鱼生饭真系无叫错，未有机会去日本，止住渴先。同行有唔想食生冷嘢，但又想食海鲜嘅朋友，所以亦都叫咗一个酱烧广岛蚝丼。呢个热丼都等咗一阵先上菜，但嚟到见到个烧蚝胀卜卜，等吓都抵啦。个蚝咬落好鲜甜，加埋个酱汁，拌埋啲烟烟韧韧嘅日本米，真系饭都扒多两啖！