西雅圖屋

营业中

休息中

屋企附近开咗间新嘅西餐厅，主打铁板扒，以后锯扒又多一个选择。餐厅位于荃新天地二期地下，门外有大型圣诞装饰，非常吸睛，打卡一流。食物方面主打铁板餐，有几款唔同嘅牛扒，仲有羊架同杂扒餐，餐汤仲可以加钱转酥皮龙虾汤，价钱合理。酥皮龙虾汤热辣辣送上，即叫即焗，酥皮保持到非常香脆，渗透着淡淡嘅牛油香，龙虾汤鲜甜浓郁，加上香草碎非常惹味，仲有啖啖弹牙嘅龙虾肉，好有诚意。肉眼扒大大件童叟无欺，肉质软嫩冇筋，我叫咗五成熟刚刚好而且冇血水，配上黑椒汁非常香浓惹味。先生嘅杂扒餐同样内容丰富，有猪扒、鸡扒、司华力肠同火腿，卖相吸引，食材质素亦唔错，特别系鸡扒，肉质嫩滑多汁，而且冇雪藏味；另外佢嘅沙嗲汁亦值得一赞，非常推荐！西多士即叫即整热辣辣好香口，淋上朱古力酱卖相吸引，沾上炼奶就更加滋味。青柠茶梳打甜度适中，配上清新嘅薄荷叶非常解渴。芒芒椰椰用上鲜芒果同椰汁打成，口感幼滑，味道香浓。