無名拉麵 (已結業)

日日午市都有人龙，品质都应该有番咁上下。拉面店黎讲，汤底嘅选择佢算系多，猪骨，味噌，虾汤，蟹汤，辛辣，钟意海鲜汤底就要试试。海老味噌汤都试过几次，虾汤反而未试过，而蟹汤就第一次见。虾汤深啡色汤，有樱虾, 入口虾味浓到甘，佢唔咸，但味超浓，浓过星洲laksa虾汤，少少腥, 饮得多有啲腻。蟹汤赞!赞!赞!冇虾汤咁浓，有少许甜，蟹味啱啱好, 完全唔腥, 比虾汤creamy好多，入口顺滑，最后我连汤都饮哂。豚骨汤有肉味兼且唔太油，层次分明，有野菜嘅甜味，口感偏薄。叉烧薄切，用焗炉(salamander)烘过，有油香但偏鞋。豚拖罗即豚脸肉，香港叫肉青，近猪颈肉但比颈肉油份分布均匀。同样烘过先上碟，入口即溶，冇筋，但脂肪含量极高，有少许猪臊味，多吃会腻。面有粗幼软硬选择，幼面硬面可以再硬啲, 粗面硬面很不错。荀未够爽脆，有啲冧，有啲筋。葱，芽菜选用博多葱及获奖芽菜，小弟未有能力食出个中分别。溏心蛋卖相味道达门槛总括系，蟹汤一定要试，虾汤齿颊留香，豚骨汤层次分明，豚拖罗可以一试，其他中规中矩。仲有, 果两位女店员好man, man到有时觉得佢地冇礼貌, 说话冇尾音, 面偏黑, 长期将笑容埋藏于内心。