尚青商號 (已搬遷) 新店位置

舖喺楼上阁仔。楼下门面嘟二维码同探热位超闷焗。行到楼上收银位，估唔到已经下午两点半仲有两组人等紧，伫立等候位置依然冇冷气到，而且冇飞攞只能干热咁排队等，后来嘅人唔想企楼梯排队都知难而退⋯⋯奉劝唔等得真系咪嚟，要预咗啲食客都系文青式慢食而唔会秒速腾空番张枱出嚟。打卡位甚多，见图，不过热到36度条街都熔嘅时候，暑到变阿呆都冇乜心情自拍他拍。约廿分钟后，汗湿之我们仨终有侍应招呼入最尽头近窗边之四人座，一下子由极热到就坐至最冷冻位置。先嚟嘅「麻辣蒜香鸡丝干拌面」拣咗小辣，所以突出咗「麻」味痺痺哋，虽然汁底唔多不过捞起辣辣哋几滋味。枱边有樽疑似辣椒酱，食开顶尽小辣嘅本人𢳂半匙，有xo 酱风味，亦都足以辣到脸出汗。再嚟嘅「台酒三杯鸡饭」，宁舍大阵仗，用热锅热住上。不过总觉调味差啲咩，辣就够但调味唔够层次。「椒盐排骨鸡汤幼面」朋友反映汤头有阵葱油味，加埋d辣酱就更加香；鸡扒炸得内脆又够热。顺带一提系老板几殷勤，主动引领我枱小朋友去厕所门口。总言：靓装台式小店，啱慢活人士。