兆和茶餐廳

营业中

休息中

行完山喺千色店散队，准备揾地方医肚，醒起朝早喺小巴站见对面有间茶记，感觉够晒街坊，几个饿鬼拿拿声走去试吓。多得食客帮手转枱，我哋先有卡位座。叫咗猪扒米线、牛腩灌汤刀削面、沙嗲牛出前一丁跟奶油脆朱同火腿奄列。猪扒米线抢先上枱，除咗猪扒仲有雪菜肉丝？入口先知喺咸酸菜，猪扒系熟识的豉油味，腌得够晒入味，食落唔死硬，仲系最钟意的连骨猪扒。米线Q弹，冇煮到过腍，又够大碗，食得开心。出前一丁同样冇煮到腍晒发胀，沙嗲牛个汁浓度刚好，搭一两条青菜，整碗丁面靓晒。奶油脆朱个样坚诱惑，够热够香脆，包包烘得金黄，食得出同上巿茶记的出品有好大分别。好彩够手快抢到半只独食。牛腩灌汤刀削面，牛腩份量多过预期，够晒腍，仲有牛筋！汤底加咗中药材，有清香的当归味，食到红枣同杞子，感觉似将阿妈煲的老火汤用嚟做汤底咁，充满住家 Feel。味道唔浓烈，略嫌咸咗啲啲。刀削面比较薄身，唔似平时食的厚身版，可能跟米线会更加好。下次行完山，会再嚟试其他嘢。