TC Bistro (已結業)

可能因为地铁去唔到新蒲岗嘅关系，小编H我一向都好少喺呢一区活动。不过大家知道工厂区代表多公司，多公司嘅地区就代表多餐厅，难得今日要去接个朋友放工，而佢咁啱又系呢一头返工，所以决定突破自己嘅框框，发掘下呢一区嘅美食地图。美国特级西冷又系我呢个牛魔王出动嘅时候喇！见到呢块扒上枱嘅时候就觉得好巨型，因为佢有我前手臂咁长！牛扒仲配埋薯菜，烤蒜头同埋烧肉汁，份量好足够！牛扒点左五成熟，切开咗之后就见得到大厨嘅功力深厚，因为佢真系啱啱好五成熟！但系又唔会有血水渗出嚟，正正系因为佢一开始就用大火锁死咗四边，等啲肉汁唔会系烹煮嘅过程流晒出嚟！唔好睇小啲配菜，啲薯仔煎香过，金黄色好香口，平时好少食淀粉质嘅我都忍唔住系咁食👹扒波士顿龙虾配白菌忌廉汁扁意粉对上一次食大大只龙虾系喺纽约，返到嚟香港一直都念念不忘，但你哋都知啦，喺香港地食龙虾真系有钱人嘅玩意，所以今次喺呢间餐厅见到二百几蚊有交易，即刻决定试一试佢！首先上碟嘅时候龙虾比我想像中大只，龙虾肉都有我手掌咁长。龙虾肉一啲都唔un又唔会有雪藏味，反而好新鲜好弹牙。虽然意粉唔系主角，但同样都好出色。意粉口感柔软度啱啱好，唔会渌到淋晒，亦都唔会太硬生勺勺咁。