上咖啡

营业中

休息中

Happy Friday 又系时候 Lunch食好少少，公司附近呢间上咖啡之前同同事食过，食物有质素，只可惜午市冇得订枱，餐厅又位于1楼，上到去冇位一来一回好花时间。今日趁同同事两个人食，我地就行上去碰碰运气。上咖啡位于利嘉中心1楼，由地下行楼梯会穿过发型屋先入到餐厅，第一次去都系同事带路先知有间楼上咖啡店系度。我地13:00到，餐厅已坐满客人，好彩今日排队人数唔多，我地等左10分钟左右就有位。餐厅装修简约，店入面摆放左书籍俾客人阅读。今日午餐有七款，唔需要加一，价钱由$62至$92。我点左新鲜粟米猪扒饭，份量都几多，新鲜粟米好甜，猪扒肉质软腍，加$8配的冻朱古力唔会太甜，味道唔错。不过由于份量太多，最后都食剩少少饭。同事点的系素食餐烤大啡菇黑松露意粉配可乐，卖相唔错，而且黑松露酱份量都多，同事话味道唔错，不过如果叫我全份午餐都唔食肉，我就唔得啦。呢度落单同执碟都系自助的，我地食饱饱就自己执好杯杯碟碟返工继续拼搏。