佳記甜品 (已搬遷) 新店位置

元朗B仔凉粉咁出名，行过元朗一定要试下。今次就嚟咗佳记甜品嘅新铺。一入到舖头，自己揾咗个位坐低，地方唔算干净，见到有啲食物残渣喺地下。只系下昼4点几，佳记甜品就已经坐满人咁滞，门庭若市，睇嚟今次应该无嚟错。菠萝凉粉：好足料！！菠萝装到满泻咁滞，菠萝好甜，唔酸，系呢一个菠萝唔当造嘅季节，仍然可以食到咁嘅品质嘅水果系相当难得。附送嘅一碗花奶令到凉粉变得更滑，基本上唔洗点咬就可以吞落喉咙。值得一赞嘅系凉粉唔会话落咗好多糖水，甜度适中。总括嚟讲，呢碗凉粉系符合水准。芒果西米露：我朋友叫嘅，食咗一啖，椰汁味香浓，西米露粒粒分明，唔错唔错。蒜蓉香辣鸡翼尖：听朋友话呢度嘅鸡翼尖好出名先至叫嘅。$16蚊咁大碟都算抵食。但系呢碟嘢嘅味道真系唔多掂。「蒜蓉」，虽然见到有好多蒜蓉，但系食唔出有蒜蓉味，所有蒜蓉味都比辣味掩盖晒。「香辣」，一定够晒辣，但系净系食到辣味，冇乜底味好似咸味咁样。鸡翼尖煲得太腍，令到鸡翼尖肉质偏霉，而鸡皮亦唔嫩滑。总括而言，呢碟鸡翼尖绝对系低于正常水准，得个辣字。