樂糖 (已結業)

呢间多咗好多食肆，呢排多数都系呢边食午餐，平时经过呢间餐厅以为系糖水舖。今日睇到门口嘅Menu见到原来有小食，有主食，仲有甜品添，几对脚就踏咗入去。餐厅细细间清清静静，墙身蓝色为主，墙面贴上白色小鸟同云嘅剪纸，天花上吊住一个个唔同颜色唔同大细嘅仿气球， 营造天空及转松气氛。我哋每人叫咗一份主食，两份甜品，食物虽然份量少，但食得出有诚意及用心。服务态度亦唔错，虽然只有厨房及楼面两名职员，不过好有礼貌及细心。黑松露软壳蟹意粉，软壳蟹炸得好脆，黑松露味都几浓，好味。夏威夷薄饼，批底松软，几好。杂锦海鲜意粉配蒜蓉榄油，虾仁，蟹柳，鲜鱿各两件，微微蒜茸味，唔错。+$30水信玄饼配云呢拿雪糕(玫瑰蜜桃味)，几精致，水信玄饼食到底嘅玫瑰蜜桃味较出，食得到雪糕嘅云呢嗱，不过入口有啲啲冰碎感。+$30雾之花卷(玫瑰荔枝花卷)，蛋糕松软，上面有玫瑰花干，忌廉几滑，入口阵阵玫瑰香味，雪糕一样有啲啲冰碎感。饮品+$3可以转大杯。柠檬蜂蜜好似食紧蜜蜂糖。