Sodam Chicken (已結業)

中环嘅大馆翻新后,好多人都专程去𠮶度打卡，欣赏完古迹后当然要系附近揾返间餐厅填饱个肚啦。sodam chicken嘅距离同大馆只有几分钟路程，亦位于兰桂坊附近，地点非常方便。呢间餐厅地方唔算好大，坐满晒人非常热闹，如果唔想等位嘅话我谂就要一早book定。我同我个朋友都系食肉兽，所以我哋一致同意要试晒炸鸡同焗鸡两款。首先我哋叫咗一份标准BBQ香辣焗鸡，于我来讲我觉得一份好嘅焗鸡要有出色嘅酱汁同埋嫩滑嘅鸡肉，呢一份焗鸡完全符合晒两个条件， BBQ酱汁啱晒钟意食辣嘅人，真系睇见张相都流晒口水。第二份就系标准嘅无骨蜜糖芥末香葱炸鸡。试完咸嘅焗鸡当然要试吓甜嘅炸鸡，炸鸡最怕就系入面啲鸡肉会变到好干，好似食紧炸粉咁样，呢份炸鸡都依然保持到嫩滑嘅鸡肉，食得出爽脆嘅炸鸡表皮，配埋香葱一齐食令到成个感觉冇咁油腻。讲样嘢食当然要讲下啲饮品啦，饮品都系食韩式炸鸡其中一个重点。我叫咗一杯苹果特饮，份量非常惊人，杯面大过我个手掌，啱晒两个女仔share饮，50几蚊抵到烂呀。我个朋友就叫咗杯水果茶，味道几清新，中和到食炸鸡嘅肥腻感。今次嘅用餐我哋非常满意，期待下次喺兰桂坊饮完野再行上嚟满足我哋食炸鸡嘅愿望。