Bougel Cafe & Bakery

营业中

休息中

屯门其实唔系本虫嘅活跃范围，今次专诚入嚟试𠵱间餐厅。首先要赞嘅系服务，尽管铺面唔大，但店员见我一个人入去攞七个人嘅枱都冇拒绝我，仲主动帮我拍枱安排。而同行中既有小朋友亦有人生日，餐厅不但有小童餐具同配上生日字句喺蛋糕上，仲特别播放埋生日歌同有精美伴碟图案。店员既有细心介绍唔同类型食品，饮品仲有好靓嘅拉花。食物方面主要分面包类同轻食类，面包由牛角包、松饼以至各种特色嘅包都包罗万有，本虫尤其喜欢开心果味。轻食类则由意粉、沙律到蛋糕都一应俱全，其中特别欣赏佢哋嘅柚子味芝士蛋糕。饮品方面拉花非常精美，果汁亦好喝，唯一需要改善嘅系茶类饮品，由于茶味唔够浓，如果冻饮再加上冰会更加淡口，因此柠茶奶茶都唔太建议。环境方面餐厅好善用空间，店外有一个精致嘅等候区，店旁外墙另设简便嘅独立座位可供顾客倚墙稍歇。室内布置同面包柜嘅装饰皆美仑美奂，令人感觉舒适。