麒藝館 (已結業)

今日同某人一齐去睇宠物精灵展览，睇完佢就带咗我去食好嘢。佢话呢间嘅花胶同埋乳猪都好出名，既然嚟到楼下，就要食吓啦。上到去见佢装修好骨致，餐具清雅，有啲似曾相识。见到有个超值孖宝$68以为睇错，原来真系咁平！孖宝有一个鲍鱼花胶挞、鲍汁花胶捞饭(足2位用)。梗系唔执输要叫返一份试吓啦鲍鱼花胶挞卖相已经好吸引，原只鲍鱼放喺花胶挞上面，挞皮放满花胶粒。鲍鱼腍滑有咬口，成个挞一齐食，更好味！花胶捞饭嚟嘅时候，上面嘅木鱼丝依然喺度摆动紧，炒饭底嘅饭粒粒分明，充满蛋香，淋上鲍汁，捞埋花胶丝、瑶柱丝、冬菇丝一齐食，确系豪呀。正价花胶菜式唔平，呢个孖宝真系超值。烧乳猪系即叫即烧，某人就点咗个例牌，果然系热辣辣 ，皮脆肉嫩，好食啊！我哋仲叫咗一个花胶扒， 花胶扒有两大旧，要剪开几节先至挟到嚟食。花胶口感腍滑又有咬口，充满养颜Q弹嘅骨胶原，呢个时候食就最啱， 正呀！最后，系不可或缺嘅甜品，叫咗麒麟果花胶冻，同埋黑芝麻擂砂汤丸。花胶冻好似水晶果冻，晶莹可爱，充满花胶粒同埋麒麟果粒，清甜可口。黑芝麻擂沙汤圆外皮软糯，夹埋流心芝麻馅，出色好味，正！