Umi

营业中

休息中

约咗朋友嚟铜锣湾聚旧，上网揾到呢间楼上 Café，景观好靓，一排大玻璃窗，可以饱览无敌维港景色，配上一室工业风装潢，啱晒同朋友嚟倾偈打卡。我哋点咗两款 Risotto，+$28 可以升级套餐，配柠檬茶特饮或美式咖啡及乳酪杯。M5和牛寿喜烧温泉蛋意大利饭 ($148)  和牛肉质细嫩，甘香肥美，入口富浓郁牛味，寿喜烧汁香醇微甜；意大利饭煮得啱啱好，黏而不软。将牛肉与温泉蛋拌匀，牛肉香、蛋黄滑，味道有层次！至于另一客蒲烧鳗鱼意大利丼饭 ($158)  亦好有睇头，鳗鱼原条上，鱼肉软嫩入味，面层烧至微焦，入口啖啖肉，酱汁咸甜合宜，杰稠得嚟又唔会盖过鱼香，配埋啲蛋丝同垫底嘅 risotto 食，口感超丰富，啖啖滋味。乳酪杯卖相精致，面头铺满干果同谷物脆米，入口酸甜软滑，非常醒胃。