八幡屋涮涮鍋 (已結業)

旺角瓊華一向係高質餐廳集中地，我同朋友已經試過入面好幾間餐廳，今日去到12樓試下呢間做緊優惠嘅涮涮鍋先～我地食既係D4日本黑毛和牛餐！呢個餐真係好豪華好豐富，有龍蝦、有鮑魚、黑毛和牛、刺身等等！鮑魚好腍，鮮蝦好甜！湯底一開始先俾一個雞煲我地嘆吓～我地又想惹味又唔太食得辣，店員就貼心咁幫我地叫BB辣，辣度剛剛好，個汁仲好香好惹味！一食就覺得有雞味得嚟又唔會太老，話咁快就食晒啲雞～食完個雞煲之後，店員話可以直接加湯做雞煲醬湯底，又可以另外揀一款湯底。我地二話不說就決定繼續食呢個雞煲醬湯底！食材同飲品都好多選擇，可以自己任拎，醬料區都有好多配料，但因為個雞煲湯太惹味喇～我根本唔需要再另加醬料！全晚最大驚喜：竟然有大閘蟹食！最近成日心思思想食大閘蟹，估唔到呢個套餐有得食，仲蒸到熱辣辣送上，真係好滿足呀！最後當然要食返個甜品啦！雖然甜品選擇唔多，但仲有好多款雪糕同雪條食～食到捧住個肚走！