包點先生 (已結業)

今晚煲咗蚝豉瘦肉粥做晚餐，所以，打算加啲点心做配菜，出完街回程经过街市，就帮衬咗呢间缩晌街市内嘅「包点先生」。铺面一眼睇晒，唔多讲。所有点心、蒸饭、炖汤、炆𩠌嘅款式及价钱都显示晒晌上面嘅电视机。当然，仲有啲中式包点，直接放咗出嚟。买咗两款点心，每一款都独立包装起嚟， 整洁卫生。潮州粉果 $19一份有4个，每个都算几大只，包到涨卜卜，不过，食落个外皮稍为厚少少，其实你睇个外观都睇到佢唔喺咁薄透，幸而口感软熟，亦唔黏牙， 里面塞满晒馅料，算喺交足功课。鸡扎 $22鸡扎就一客两大件，大大只包足馅，外层嘅腐竹好有豆香，里面嘅鸡肉好嫩滑，火腿食得出亦唔喺平价货色，仲有大大件软熟嘅鱼肚，整体味道确喺唔错。今次试住佢两款点心先，有机会试下佢啲蒸饭得唔得，因为见到啲蒸饭款式多，又只喺卖$26，可以讲喺粮尾恩物。