喜運點心專門店 (已結業)

想食一盅两件，除咗酒楼之外其实都仲有选择嘅！石门呢间喜运点心专门店，喺正石门站出面，位置极方便，虽然铺面细细地，未必有酒楼坐得咁舒服，不过食物质素都好唔错。佢有点心、包类、肠粉类和饭面等，全部明码实价，唔系分大中小点，特别推介佢嘅孖宝优惠，可以拣蒸饭加点心或者肠粉加点心，分别都系$48或者$45 ，我觉得都几抵。今日就试晒两个蒸饭孖宝，有凤爪排骨饭和北菇滑鸡饭，点心都有八个选择，我哋就拣咗鲜虾烧卖皇同埋陈皮鲜竹牛肉球。蒸饭份量多，味道不错，两款都ok。烧卖都大粒，上面有蟹籽。牛肉球一碟三粒，陈皮味就唔系好觉，同酒楼𠮶啲冇乜分别。另外我哋都仲叫多咗两个点心，鲍螺片棉花鸡（ $27 ）同埋一碗上汤鲜虾水饺（ $42），一碗有五只仲有菜，都好新鲜好味又大只。棉花鸡一向系我喜欢嘅点心，呢度都做得唔错，啲棉花索晒啲汁好味，鲍螺片烟韧，鸡又够滑。由于唔洗加一，埋单价钱平过饮茶！