德國餐廳 (翠怡花園) (已搬遷) 新店位置

因为疫情都有年几冇去过旅行，呢日同朋友嚟到大埔呢间德国餐厅，谂住食吓德国菜，重拾下系德国旅行嘅回忆。为咗防止病毒传播，呢度系用电子菜牌落单，一嚟够环保，二嚟干净衞生。一打开餐牌果然有好多款有德国特色嘅食物，例如有香肠拼盘呀猪手咁。我地两个人就嗌咗份咸猪手。等候时间唔系好长，10分钟左右猪手就上桌，果然好大份！餐厅已经好贴心帮我地切好哂，猪手啖啖肉，而且咸香味十足，外皮都好酥脆。猪手沾一沾黄芥末味道会更突出添！另外佢伴碟嘅沙律同酸菜亦都好好味，一碟嘢够哂满足两个人嘅胃口。谂起德国，唔少得就系啤酒，呢度嘅选择好多，我地见做紧promo有枝朱古力黑啤，于是一人嗌咗枝嚟饮，一饮果然朱古力味好重，虽然系黑啤但女仔都会钟意。呢晚简简单单肉加酒就一解无得去旅行就忧愁。