花子舍 (已結業)

话说，我哋又去咗铜锣湾玩密室，玩完一个又一个，最后终于肯收手。我好肚饿呀，M佬，快啲去揾嘢食。佢带我行呀行，行到去信德街，转弯就见到Rosedale酒店。哗，咁正去酒店食？不过点知我哋过对面，见到间小餐厅，叫花子舍 Florahouse。一入到去，就见到花，全部都系花，又几靓㖞！好啦！快啲叫嘢食，我哋两个叫咗两个晚餐，有餐汤、沙律同饮品，都几抵！南瓜忌廉汤𠮶汤热辣辣，金黄色，一嚟到就闻到好香南瓜味。啲南瓜蓉又磨得好滑， 正！烟三文鱼田园沙律烟三文鱼砌成玫瑰花型，沙律菜非常新鲜，好Juicy同爽口，加埋粟米同车厘茄， 好Fresh！罗勒煎带子扁意粉带子煎到啱啱好，外面金黄色，里面仲系好鲜嫩多汁，入口弹牙。扁意粉烟靭啱啱好，加埋罗勒叶，好香！最后洒上少少柠檬皮碎，所以入口有少少酸，好醒胃。德国脆皮咸猪手一嚟到，就已经闻到好香，外皮烤到劲香脆，食落又唔系好油腻。猪手肉就肥瘦适中，肉质软嫰，识食一定系连皮食，真系无得弹！