牛一 (屯門市廣場1期) (已結業)

屯门市广场嘅牛一有90分钟火锅放题， 平时佢可以遥距攞飞嘅，不过宵夜时段即九点半后就只系可以喺门口排队，今日我哋九点钟松啲嚟到，排队等左半个钟就有得入座喇！呢度经常都会有限定嘅火锅汤底，最近就有韩式牛尾锅，因为听到韩式呢个字就即刻担心会系好辣嘅，所以即刻问店员，好彩系一啲都唔辣嘅🤣🤣不过呢个汤底就冇咩特别喇！我哋拣咗价值$178嘅牛肉同豚肉，而呢度嘅火锅配料都有好多选择，例如龙虾丸，牛丸，豆卜，芝士肠，肠仔，冬菇，木耳，年糕等等，仲有非常健康嘅羽衣甘蓝。另外呢度有自助饮品，汽水茶类不在话下，仲有柠檬茶，菊花茶，椰子汁，酒类，都算多选择！呢度仲有自助嘅乳酪雪糕，成日都有唔同嘅口味，今次就有原味乳酪，芒果乳酪，士多啤梨味雪糕，可惜因为太晏，芒果乳酪已经清左机喇！特别一提士多啤梨味雪糕真系好伏，好难食🤨🤨同埋乳酪配料去到最尾嘅时候已经得返好少。