圓老爺雞煲小廚 (已結業)

今晚要去丰年路附近看医生，因此就系附近食晚饭，平时比较少行去呢头揾食，兜左一个圈就拣左呢间圆老爷鸡煲小厨，拣嘅原因系呢间人气最旺，加上装修唔错，座位阔落，最紧要系坐得舒服。呢间主打鸡煲及大热酸菜鱼，我叫左个飘香酱王鸡煲（$122）价钱亲民，大大煲，酱汁唔稀兼唔辣得嚟又有带甜味，层次丰富，鸡肉嫩滑又新鲜，好抵食。呢间小厨都有好多海鲜食，我叫左金沙鳝柳（$108 ）超惊喜系咸蛋黄比市面食肆多，丰富加上绝不干身，鳝柳肉质鲜嫩，外脆内软。蒜蓉牛油爆青口（$98）青口够厚身，佢特别在有少少西式感觉，充满着牛油混合蒜蓉香味，保持青口嘅鲜甜，又够大碟，食得满足。总括嚟讲，圆老爷绝对系隐世高质小厨，好耐未食过一间价钱咁实惠又材料一流再加上煮工细致好味，有种去左酒店食中餐嘅感觉，一定会再来。