深仔記

营业中

休息中

好少去观塘，最近喺附近上紧一个课程，每日都喺度捐窿捐罅揾好嘢食。见到深仔记门外有好大个餐牌，以为系平时工厦饭堂食颓饭，都冇乜特别期望。睇吓个餐牌，咦！又几有惊喜㖞，佢面类唔单止有云吞面𠮶啲港式面当必备嘅配菜，仲有新鲜鱿鱼、肥饿肠等等。食物方便好有惊喜，首先黑柏叶嘅份量好多，你见到足足铺满成碗面。黑柏叶切成幼条，比较容易入口，而且烚得啱啱好，唔会熟得滞过轫，有咬口得嚟唔会𡁻唔烂。面质同埋汤底都系有传统面家嘅水准，老实讲我觉得面质拍得住「奀X记」。入口系爽口嘅，唔会淋Patpat亦唔会硬到𡁻唔开。面嘅枧水味唔系好重，亦够弹牙。汤底有淡淡大地鱼汤味，即使我碗面入边已经有好多姜葱，但系依然食得出汤底有鱼味，而且唔会比碱水盖过汤底嘅味道。随面附上辣椒豉油，唔算好辣但几细心，俾你配黑柏叶去食。而且价钱都算公道，我叫嘅姜葱黑柏叶面只系$43 ，好多时出边黑柏叶都唔可以直接配面，要单点价钱就会比较贵。加$10去买冻柠茶，买单都只系53 ，算几抵食。食品质素整体都好高质，座位都舒服因为我有梳化位，但店中间嘅圆台就要坐胶凳，可能无咁舒适。另外我叫嘅少甜冻柠茶都几甜，好似无特别做到少甜，希望下次可以改善。