宏 (已搬遷) 新店位置

今日同𠮶friend去 The One 睇戏，顺便喺度揾埋食，先前有朋友介绍五楼𠮶间〈宏〉，话D绿茶甜品好出色，咁就一于试吓喇！装修时尚雅致，座位宽敞舒适，最啱优哉悠喺度叹个long lunch。睇吓餐牌，有各式各样嘅日本丼同乌冬定食，另外又有意粉选择，不过最吸引我嘅系林林总总嘅甜点同特饮。越睇越想食，唔好讲咁多，先嚟个宇治抹茶沙冰软雪糕，大大杯，好吸引，呷一口凉到入心嘅沙冰，再加上香甜滑溜嘅绿茶雪糕，真系令人停唔到口，佛手柑沙冰，酸酸甜甜，味道清新无比，赞！我叫咗个大鳗鱼饭套餐，包括有鳗鱼饭、沙律、海藻乌冬、小抹茶蛋卷同红茶等。鳗鱼又香又甜，滋味十足，呢D用新潟米，口感绵腻。清清哋嘅海藻乌冬，幼滑爽口，别具新鲜感。海鲜海藻意大利粉，卖相不俗，意粉内加入海藻，食落别具风味，值得一试。随餐奉上嘅抹茶蛋卷同芝蔴蛋卷，甜美可口。我哋两个抹茶控，又点会咁易罢休，当然要追加…先嚟个京都宇治抹茶软雪糕芭菲，哗！哗！哗！淡淡抹茶香嘅软雪糕，加上红豆、杏仁薄脆、抹茶果冻，好味之极。京都宇治抹茶芭菲同一姊妹作，同样诱惑。呢餐真系豁咗出去，将卡路里完全抛诸脑后。如果你喜欢抹茶甜品，《宏》绝对值得一试！