金苑粉麵

营业中

休息中

下午坐车出土瓜湾，落山道巴士站落车，距离约会时间仲有半个钟，又未食嘢，够时间食个快餐，望两望，装两装，食碗粉面肯定最快手，点知畀我揾到嘅间惊喜嘢。一坐低，店员即刻过嚟问我食啲乜？大佬呀！我第一次嚟帮衬，鬼知你有咩食咩？于是同佢讲话等阵先，佢行开咗。我迅速打开餐牌，入面好鬼多选择，但好彩第一时间吸引我嘅系大大只字「鱼面」，再望下细项，吸引我嘅字系「鲜墨鱼须」，正在犹疑之际，个店员又走埋嚟问我食啲乜，前后我谂两分钟都无，讲真咁嘅态度真系好赶客，你又唔系澳牛，间舖又只得5成满左右，何必咁赶住落单呢？佢既然咁赶，我亦无谓心多，一于叫鲜墨鱼须鱼面，见到佢个餐牌有话加钱可以有我至爱之一嘅鱼皮，咁就加埋落去啦！鱼皮先到，弊！韧口。再过几分钟，鱼面终于到，原本想叫杯饮品，但饮咗一啖汤之后，取消呢个打算，事后亦证明我呢个决定系正确，因为我系成碗汤饮哂，之后一直唔口渴。手机食完到我食，我先将鱼皮放落汤度浸腍，咬一啖墨鱼须，个鲜味即时出到嚟，虽然系硬咗少少，但鲜味真系没法挡，鱼面就无乜惊喜，但唔会太差，可以啦！而鱼皮浸腍后，唔会太难食，埋单$46，应该会有下次嘅，虽然个店员催命鬼嘅态度真系好唔掂。