人和月雞煲火鍋店 (已結業)

天气开始冻， 食定个鸡煲过冬！人和月好耐之前帮衬过， 记得个质素唔错， 今日路经尖沙嘴， 再嚟返啅！今日点咗A餐， $298吃到饱套餐！前菜要咗麻辣鸡煲（小辣）， 火锅汤底拣咗胡椒猪肚汤！鸡煲好快就上台， 小辣辣度好轻微， 唔食辣嘅人都应该顶得顺。 鸡肉嫩滑， 麻辣味度好入味， 而且鸡件数量好多（太多， 搅到好易饱）！食完鸡煲之后， 就换胡椒猪肚汤打边炉，套餐先嚟一个牛肉拼盘 - 雪花肥牛、牛舌、牛板腱、牛下肩同埋牛胸爽。 胡椒猪肚汤味道浓郁，一开头嘅胡椒味唔算重，但越食越辣，而猪肚嘅份量系非常之多！牛肉拼盘嘅牛全部都好重口味，质素非常之高。个质素唔会因为298呢个价钱而降低！赞！ 个人推介雪花肥牛同埋牛板腱， 牛味超劲， 入口松软！ 好正！除咗牛肉之外，仲有好多唔同嘅食物选择，出面自助区域有泰式烧猪颈肉、冰镇醉鲍鱼、炆牛腩、各式各样丸类同埋唔同嘅蔬菜！ 而嘢饮亦都系应有尽有！ 最后仲有全食牛奶公司雪糕、 豆腐花等甜品！ 人和月呢间餐厅价钱、质素、服务态度等等都10分高质，诚意推介呢间餐厅！