池記 (已結業)

夜妈妈喺中环放学，近10点真系死城一个，冇乜好食。见池记未打烊，即管入去一试。之前总系觉得佢太贵，甚至比麦奀、麦文嘅更贵，所以都系无冲动入去食。嚟一间广东面家食嘢，基本盘一定要试返碗云吞啦！自古以来，云吞都系小食，所以包到细细粒一啖一粒最啱数，所以，沾仔所谓首创嘅乒乓波咁大嚿嘅云吞，觉得始终都系gimmick居多，一啖食唔哂其实唔系咁钟意。另外，其实包云吞嘅形态度都好重要。包一粒云吞总要留条尾，真系可以靓到好似一条金鱼尾一样，放汤时散开，真系好似欣赏紧条金鱼游水一样！池记绝对做到了，系我食过咁多间云吞面面家之中，尾部形态最靓嘅，而并无之一。其他好多时唔系条尾太短，就系包嘅时候手心揸得太用力，将条尾揿实咗。可惜，用料方面比较逊色。虾嘅size ok但肉质唔爽有d韧。云吞并非全虾云吞，有10-20%猪肉左右，调味适中。惊喜之处系食到又少少大地鱼干加咗入去捞馅，散发那种独特嘅香味；尽管如此，由于虾嘅质地差，整体上令到成碗云吞完全失色。正所谓色香如何好，总要靠味道！$50一碗真系完全唔值，试一次就够，不会再有下次。