石磨坊 (已結業)

呢间系第一间店，食咗都有几年。当年佢未有分店𠮶阵，真系周时夜晚摆枱摆到周围都系，仲要几十人等位等外卖，情况同松记差唔多。楼上啲人一路都有投诉，我仲见过贴大字报出嚟话再嘈亲就掟嘢落嚟。后来后舖开多个位，有啲诡异咁。再过咗一排就先后开多两间，而家都好少再帮衬呢间。嚟呢度食，当然系食个刨冰。咁多只味都食过晒，都系杂果或芒果最好食，栗子略嫌「漏」咗少少。不过佢哋入啲生果唔算靓，导致食物质素唔稳定。啲糊唔算特别好食，同大良八记差唔多。不过讲真我又觉得好难会有特别好食嘅糊，特别难食嘅我就食过好多…仲有自己都几钟意食个奶皇蛋白炖奶。前排行过见少咗好多烂仔。以前好多卖老翻嘅细路走鬼𠮶阵避入嚟，唔叫嘢食剩系食烟讲嘢大大声好多懒音，而家都冇晒咯。下次再行过入去食返个冰for old time's sake先。