新和富餐廳菜館 (已結業)

琴日又去接女友放工，决定行远少少去呢条北角嘅食街揾食...几年前嚟过佢哋旁边嘅姊妹店仁宝，印象唔错，今次去正铺食，断估都唔会太差啩...忽然好想食蚝，就整个砵酒焗生蚝。加入大量葱段及洋葱，D葱索晒大部份嘅汁，比蚝更好食。砵酒味浓，蚝用美国桶蚝，大大只，好够味，诚属不可多得之作...食得兴起，再嚟过凉瓜炒蛏子皇。蛏子大大只，难得煮得够爽亦够鲜甜，配合豆豉香及凉瓜嘅甘苦，吃得不亦乐乎...招牌菜笼仔荷叶蒸虾饭反而有D失望。饭冇乜荷香，金蒜亦落得唔够，不过份量够多，虾都算几新鲜，补番数...埋尾嘅芋蓉西米露着实有惊喜---- 芋头粒够粉，充满椰蓉香(过气甜品专家认为系D椰蓉应该系佢哋自己磨嘅)，甜度刚好，食到唔停得口...可以列为"食得过单位"...