澳瑪葡國菜 (已結業)

今日下午我们喺尖沙咀做完嘢之后去咗海港城行吓，行到海运大厦𠮶边已经系夜晚大约7点几，所以我们就睇吓有咩餐厅食饭，行咗一段见到有间系食特色葡萄牙菜叫「澳玛葡国菜」嘅餐厅，而且店外摆放著一个牌话用Citibank信用卡答帐，就可以有支红酒或白酒送，而且都有几多人喺度等位，所以我们就决定入去食晚饭！我们问店员有咩招牌菜同埋比较受欢迎嘅可以推介畀我们？店员就推介咗炭烧鲗鱼烧得好香脆同香气扑鼻，肉质相当鲜甜嫩滑，底层铺满咗杂菜同薯仔，而且吸收晒鱼肉嘅鲜味同炭烧嘅香味，真系好正呀！招牌炭烧霹雳春鸡嘅肉质非常嫩滑，就算系鸡胸嘅肉质都唔会有「嚡」嘅感觉，而且外层嘅烧到有一层焦香，再喺表面搽上秘制嘅酱汁，味道相当惹味香口！葡式烤乳猪嘅外皮烤得好香口脆身，肉质相当松软嫩滑，而且唔会有太多嘅脂肪，所以唔会有好油腻嘅感觉！葡式肉肠焗鸭饭嘅饭吸收晒鸭汤汁嘅精华，焗到金黄色，而且表面有啲焦香同铺咗啲烟韧嘅肉肠，饭嘅入面放咗软滑嘅鸭肉丝，令到味道更加芳香，真系好惹味！店内嘅环境装修相当舒适，餐具同咕𠱸亦印咗餐厅嘅名称同图案，真系几有心思！