阿木台灣麵 (豉油街)

营业中

休息中

今日想食牛肉面，谂起门口经常大排长龙嘅阿木。一个人专登去旺角豉油街分店食晏。12点过啲门口已经要等位，还好等咗10分钟已经有位，坐低叫咗红烧牛肉面，追加一份卤牛肚丝再加咗杯珍珠奶茶。红烧牛肉面好大一碗，面份量唔多但有四大块牛腱肉，块块都近一公分厚，牛肉冧身咬落唔痴牙，加埋酸菜和浓味汤头，真心觉得扺食。要挑剔嘅话，面唔够Q，有啲粉粉嘅口感，汤头稍为偏咸。以60蚊嘅价钱，整体算系唔错，值得推荐。追加嘅卤牛肚丝小食就一般，除咗够冧身外，份量少，冇乜卤水香味，味道一般，23蚊唔扺食。至于珍珠奶茶，唔够300cc，冇乜特别，但10蚊一杯仲想点。午餐唔使100蚊，饱到上心口，呢餐食得太多肉，今晚要食清淡啲先得啦。