何蘭正

营业中

休息中

就算系平日6点半都差唔多7成满座，记得一定要book位，因为迟book嘅关系所以坐吧枱。服务有礼貌，十分唔错，有加一收费，但冇限时，而且我好欣赏碟有加热保暖。*24小时慢煮伊比利亚叉烧配日本温泉蛋，红洋葱渍，香喷喷香葱猪油捞饭 $198（+$100 配煎西班牙肥鸭肝）半肥瘦叉烧肉质软腍，有肉香又有油香，调味偏向咸香，多啲蜜糖味会更加似叉烧。肥鸭肝必须加！煎到金黄，满满嘅油脂香，配饭配叉烧都好强。反而猪油捞饭略为失色，油香未够强之余，配叉烧/鸭肝显得过份油腻。盐味焦黄牛油煎杏鲍菇，大火炒鹤薮白菜，法式幼滑薯蓉，焦香老蛋茄茸汁 $168估你唔到咁好食！杏鲍菇厚切可以当扒咁锯，𠝹花后更加索到牛油香。番茄炒蛋+薯蓉意外地夹，用鹤薮捞埋食都好夹。薯蓉好滑又唔腻，加埋甜甜嘅茄茸汁好好味。熔岩啤 Mother goat doppelbock $75店员介绍熔岩啤系德式啤酒，印象中佢讲解系德国人冬天想饮啤酒又怕冻，所以要加热啤酒。就咁单饮系麦味香浓嘅啤酒，之后店员会烧红铁棒再放入啤酒加热，即刻好多泡泡炸出嚟。饮落啤酒泡暖暖哋，啤酒仲冻，有种饮dirty嘅感觉，仲多咗种焦糖甜味。