敏華冰廳 (V Walk)

营业中

休息中

呢几年因为成日都要出Trip , 所以多咗食国外唔同嘅美食，但讲到每次离开香港最令我怀念嘅，始终都系微小但却伟大嘅香港本土食物。沙嗲牛面、厚多士同热奶茶呢个组合，绝对系几十年嚟不变嘅黄金搭配。作为香港人，无论食几多次都唔会厌，因为冰室同茶记嘢食，系属于我哋嘅集体回忆。讲番呢间敏华冰厅先，由之前佢仲叫“文华冰室”𠮶阵，我已经系忠实fans，就算改咗名又开咗咁多间分店，食物质素依然保持一贯嘅高水准，沙嗲牛面香浓入味、牛肉新鲜嫩滑，厚多士烘得啱啱好、香脆可口，而多士表面净低嘅余温，就令冰冻嘅牛油融化得恰到好处，令幼滑柔和嘅牛油触感喺厚多士表面得到一种默契级嘅配合同提升，喺脆同软、热同冷之间，我已经被感动到无法言语。最后，唔可以唔提佢杯奶茶。茶香饱满、奶味细滑、一口入魂、百转千回。一路都觉得港式奶茶就系香港嘅文化符号，奶茶用料虽然简单，都不过系红茶同淡奶，而口感上醇厚丝滑的奥妙，就在于撞茶呢道工序。撞茶，讲到底就系茶同水嘅撞击，至于要撞击几多次先可以得到最顺滑嘅质地，就有赖经验丰富嘅师傅喇，而呢种唔怕苦、唔怕错嘅精神，正正就系香港人最可贵嘅精彩财富。香港加油，香港人加油。