京香閣 (已結業)

朋友最近返新工，佢话之前同同事试过位于无限广场嘅呢一间京香阁，个水准都唔错。一于拉埋我哋一齐去食呢个咁抵嘅京菜放题，最紧要嘅系有片皮鸭任食，对于钟意食中菜嘅人嚟讲，绝对系非常开心。片皮鸭任食当然系重点，但都可以选择龙虾套餐，或者虎虾套餐，我哋就选择咗龙虾餐， 听店员讲讲，蒜蓉或者干烧都好惹味，所以就试试蒜蓉味啦。果然唔错，龙虾够晒大只，而且好弹牙，加埋蒜蓉够晒香，非常好食。至于炖汤都好足料，有虫草花同花胶，加上鸡汤味道浓郁，饮落好滋润。重头戏当然系片皮鸭啦，师傅现切片皮鸭，够晒新鲜，切得厚薄适中。亦有新鲜蒸嘅北京么么，即系平时包片皮鸭𠮶层皮。爆汁嘅鸭皮埋青瓜同京葱一齐食，好食到停唔到口，忍唔住食多两件。亦都有好多款京式小菜、凉菜、汤、粉面任食，味道都唔错。特别推荐呢个醉虾，酒味香浓，不过唔会太重味，但就算唔饮酒嘅人都啱食。而且啲虾肉质好弹牙爽口，虾肉好鲜甜，必试。仲有好多款即叫即蒸嘅点心同甜品，尤其小笼包最多人嗌，够晒皮薄多汁，每人食返一笼是常识吧。最后食埋个高力豆沙作结，豆沙甜而不腻，令人食得满足。