魚台外賣壽司 (已結業)

之前住沙田，搬左黎马鞍山半年有多，环境交通都唔错，唯一唔惯系成个马鞍山都无咩好野食。早前系杂志见到呢间鱼台既创业报导，上黎openrice search吓，原来系新居附近开左分店，终于今晚收工去买黎试吓。最平既$4一件三文鱼质素都唔错，带子够大只值得推介，两款虾都唔错，北寄贝够大块。所有寿司即叫即做，感觉几卫生，佢地自创既虾天妇罗寿司，因为即炸，返到屋企都仲系微热，脆卜卜。讲左咁多好既，都有啲唔好既，好似系海胆同三文鱼子就真系麻麻地，三文鱼腩食唔出同三文鱼有咩分别。另外就系等既时间，买完比左钱，拎住张单行去超市买啲野，返黎谂住攞得啦，点知个收银既女仔应该比错左我果份人地攞走左，要再等师傅做过一份比我，前后等左超过20分钟，正常应该10分钟OK。