味真越 (已易手) 新餐厅

南港岛线试搭，去完海洋公园，当然去埋探索神秘嘅南区，利东呢个地方真系完全冇踏足过，原来就系大名鼎鼎嘅鸭脷洲。原本谂住食熟食中心，点知热闹非常，唯有喺街求其揾嘢食。呢间越菜小店离地铁站不远，铺头唔大，座位应该只有约二十个，小店嘅格局，夹埋小店嘅价钱，真系买少见少。可能已经比较晏，生牛肉同蒙粉两味主菜都沽清，店主亦不厌其烦咁提醒每一位食客，相当负责任。香茅猪扒捞河多数食店嘅捞粉都系贵过汤粉，反而呢间嘅捞粉平成十蚊。$38大大块猪扒，捞埋花生碎食，唔洗落太多汁都好好味。扎肉捞河有两款扎肉，特别版嘅胡椒味好浓，加埋啲菇碎乜乜碎咁，真系非一般嘅扎肉鸡丝沙律大份到哗一声。丝形物体唔似青瓜唔似薯仔，一问之下原来系青木瓜。平时好惊食木瓜，但呢种一啲木瓜味都冇，好爽口，成个沙律十分出色。泰式凤爪无骨之余保留咗筋位，仲好有凤爪型，口感一流。腌得好够，略为重口味，捞粉食比较平衡。整体水准不错，价钱却系商场铺嘅一半，值得一试